The Precipitate

  حبة قرف موزون  و الهم في القافية  الحزن آخره نون  والضحكة بالعافية  و الدمع اصلا نقط و العقد لما انفرط  صعب علينا الغلط  و الكلمة مش كافية

احنا بشر يا ناس كما بقيت الناس لا هُمّ أزيد تمن ولا اتولدنا رخاص مش محتاجين نتربط ولا نتخبط عل الراس سواسيّة ساعة الألم سواسيّة في الأعراس سواسيّة حب و أمل و شركا في الأنفاس لا حد قلبه ورق ولا حد قلبه ماس واحد في يوم ما انخلق و اللي فَرَق نخّاس لوِّن عيون البشر و وزّع الأجناس قَسِّم ملوك و عبيد و عيِّن الحراس يا تصدقوا كدبتي يا إما سيف و رصاص العرش دم و دهب و الصولجان وسواس اسمع يا عم الملِك يا فتوّة يا هجّاص مش محتاجين نِتملِك ولا كييفين نتداس و لا محتاجين قبضتك و الضلمة و الترباس أنا الولد و البلد أنا السلاح و الفاس أنا القلم و العَلَم و المدْنة و الأجراس و سمايا مش منحتك و الأرض ملك الناس و رقبتي ملكي أنا ولا عمري هحني الراس أنا زيّي زيّك بشر و مفيش ايدين تنباس أنا زيّي زيّك بشر و العدل بس اساس